Den første Fløgstad skule stod på Øyra. Skulehuset der var i bruk frå 1876 til det vart rive i 1927. I dag står ein statue av to skuleborn (laga av kunstnaren Svein-Tore Kleppan) på bankplassen der skulen stod.

Stor tilflytting i samband med industrireisinga gjorde at det måtte byggjast ny og større skule. Arkitekten Torgeir Alvsaker frå Bergen fekk oppgåva med å teikna skulen. I desember 1926 stod første byggetrinn ferdig på Lofthus, opprinneleg ein del av Åbø. Skulen fekk med seg både namnet og dei same krinsgrensene frå skulen på Øyra.

Alt etter eit par- tre år var skulen for liten, og eit andre byggetrinn stod ferdig i 1930. Men elevtalet fortsette å stiga, og i 1936 var tredje og siste byggjetrinn klart til bruk. Fløgstad skule var då det største skulebygget i Rogaland utanom byane.

I skulen var det 12 klasserom og ni spesialrom i tillegg til lærarrom, lærarinnerom, styrarkontor, rom til skuletannlegen og vaktmeisterbustad. På det meste var det fem forskjellige skuleslag og 700 elevar knytt til skulen.

Skulen blei renovert i perioden januar 2008–august 2009. Bygget blir brukt og teke vare på som eit viktig kulturminne. I 2018 var det 144 elevar ved skulen.

---

Bli kjend med Åbøbyen

Det er sett opp 15 skilt i Åbøbyen. Klikk på punkta under for å lesa meir:

1. Åbøbyen
2. Idrettsbanen
3. Haakonsgate 51-53
4. Wergelandsveien
5. Gardshusa
6. Varelageret
7. Sauda Klubb
8. Tennisbanen
9. Arkitekturen
10. Fløgstad skule
11. Sjukehuset
12. Hagebyen
13. Strømhuset
14. Sneaths park
15. Byanlegget

---