Det er sers positivt at det blei bygd ei dagsturhytte i Sauda. Men det som ikkje er positivt, er namnet som nokon har gitt hytta.
Å kalla hytta for Ørneredet er uforståeleg og heilt historielaust. For alle som kjenner til historia om andre verdskrig, så veit ein at Ørneredet var namnet som blei brukt på Adolf Hitler sin landstad. Ørneredet er eit så belastande ord og gir så vonde assisasjonar at det ikkje bør brukast på ei hytte i Sauda.
Er det ørn i området der Dagsturhytta er plassert? Er det difor namnet er valt? I så fall burde namnet vera Ørnereiret, ordet rede høyrer ikkje heime i saudadialekta.
Dagsturhytta ligg ved Urabøfjellet. Gamle folk i Saudasjøen har fortalt at det er dette namnet som er blitt brukt om fjellet der hytta ligg. Kvifor ikkje bruka dette namnet og kalla hytta Urabøhytta? Då nyttar ein eit stadnamn som alt er i bruk, det gjer at fleire saudabuar blir kjent med namnet, og namnet blir halde i hevd.
Sjølv om det er sett opp fleire skilt på veg til hytta, og namnet på hytta er kome med i boka over dagsturhytter i Rogaland, er det ingen grunn til ikkje å endra namnet. Det kan lagast nye skilt og sendast melding gjennom media at hytta i Sauda har fått nytt namn.
Mange har reagert negativt på namnet. Det er ingen skam å snu! Hytta er så ny at namnet ikkje har fått festa seg. La oss sleppa å kalla ei hytte ved Urabøfjellet for eit namn som får oss til å tenka på mannen som utløyste den andre verdskrigen.
| Sauda Mållag Margoth Sundsbø Leiar | Sauda sogelag Aslaug Astad Leiar |
