Viser til årsprogrammet 2024. Sogelagsmøtet 19. mars blir flytta til onsdag 13. mars. Meir info om sjølve møtet kjem.
Oppdatering: Møtet 13. mars om Sauda fabrikkarbeiderforening 100 år er diverre avlyst.
Viktig endring
Forfatter: admin
Filmsnuttar frå 1960-talet og årsmøte i sogelaget
Tysdag i neste veke inviterer Sauda sogelag til filmframsyning i Storesalen i Folkets Hus. Inge Mikal Nødland er blitt filmregissør. Filmfotografen var ein gong urmakar Jensen.
Urmakar Bernhard Jensen kom til Sauda frå Kopervik i 1930 og dreiv verkstaden sin i Rådhusgata i 70 år. Jensen var kjend for meir enn at han kunne reparere klokker. Han hadde så mange jern i elden. Mellom anna var han «hobbykunstmalar», han skreiv dikt som han fekk trykt i Ryfylke, og han gav ut si eiga gratisavis som han leverte rundt på butikkane på Øyra. Og så tok han opp smalfilm. Då Jensen døydde i 2004 let han etter seg mengder av 16 mm filmrullar, i hovudsak tatt opp kring i Sauda på 1960-talet.
Eskene med filmrullar kom etter kvart lokalhistorieentusiasten og samlaren Inge Mikal Nødland i hende. Han såg verdien av filmane, og no har han fått dei «vaska», reinsa og klipt. Så er dei blitt digitaliserte og sett saman slik at Inge Mikal no kan by på ei 45-minutts framsyning på stort og flott lerret i Storesalen.
Februar er meir enn vinter, glatte fortau og høge brøytekantar. Det er også årsmøtemånaden for lag og foreiningar. Difor legg Sauda sogelag årsmøtet sitt til denne kvelden. Årsmøta i sogelaget er til vanleg greitt avvikla. Valkomiteen har gjort jobben, og dei har fått ja frå alle dei har spurd.
Ver velkomne, anten du er medlem eller ikkje, til det første sogelagsmøte i 2024 – til filmframsyning, allsong, sogelagsmat og god drøs. Billettar er til sals på nett, på biblioteket og ved inngangen. Oppdatering 15.02.2024: Alle billettane er nå utseld!
– Roar Lund
- Dato: Tysdag 20. februar
- Tidspunkt: kl 19:00
- Stad: Storesal på Folkets Hus
- Sogelagsmat. Entre 130 kr
God jul!
Sogelaget vil med dette ønskje alle ei god jul og eit godt nytt år!
Takk for alle som har følgd oss i året som har gått - håpar de blir med oss vidare i 2024!
Skal du gi årsskriftet i julegåve?
Fredag 15. og laurdag 16. desember er dei siste dagane for adventbokhandelen i Skulegata. Opningstid: kl 12-14.
Etter dette vil Årsskrift 2023 vere til sals hos Companiet eller du kan bestilla det på nettsida vår.
Merk: Bur du utanføre Sauda og skal ha pakka tilsendt i posten vil det vera Posten sine fristar som gjeld: 19. desember (til adresser i Sør-Noreg) og 15. desember (til adresser i Nord-Noreg).
Omtale: Sauda sogelags årsskrift 2023
Sauda sogelag er eit svært aktivt lag som har kome med årsskrift i heile 43 år. I årets rikhaldige utgave vert det markert at det i år er l00 år sidan smelteverket starta opp.
Fabrikken, som skulle bli hjørnesteinsbedrifta i nabokommunen vår og gi sikkert arbeid til, mellom anna, mange utflytta suldøler opp gjennom åra. Og som har gjort alle spådommar om tungindustrien sin snarlege død til skamme.
Vegen over Røldalsfjellet
Me har då endeleg kjørt over Røldalsfjellet nokre gonger gjennom åra. Ståle Lunde skriv om førehistoria til vegen, og om bygginga. Vegen vart opna i 196o av Trygve Bratteli, han var samferdselsminister då. Men me forstår at han viste liten entusiasme for denne oppgåva. Ingen hadde høyrt kortare Takk for maten-tale under festmiddagen.
Levande om legen og husmannstida i Hylsfjorden
Olav Gramstad var lege i Sauda ein mannsalder, fram til 1975. Sonen Sigved skriv levande om faren, som var son til presten på Sand, og vaks opp her på strandstaden. Nokre travle år var han doktor i Suldal i tillegg.
Lars Olav Fatland har store kunnskaper om husmannstida i vårt distrikt, særleg langs Hylsfjorden. Han skildrar livsløpet til tre personar med husmannsbakgrunn, som alle hadde eller fekk ein link til Sauda. Ei av dei var Brita Njelsdotter frå Hellandsbygd, som vart buande det meste av sitt strevsame og lange liv i Tengesdal. Ho blei 107 år gamal.
«Faster By’ n»
Kåre Rød fortel om «Faster By’n», ei jente frå enkle kår på Teig, men som vart så «godt gift» at ho arva «halve Stavanger», som det heitte seg. Men ho gløymde ikkje heimbygda si og delte raust.
Me kan notera oss nok eit solid og forvitneleg årskrift frå Sauda med andre ord.
Bjarte Skipevåg, Suldal sogelag
