Me opnar fredag 24. november og held ope mellom kl 1200 og 1400 fredagar og laurdagar til og med 16. desember i lokala til Bryne’s konditori (Skulegata 6).
Prisliste
Årsskrift Sauda sogelag 2023
300 kr (medl. 250 kr)
Gamalt frå Suldal 2023
250 kr
Vindetreet
270 kr
Årbok Rogaland historielag 2023
395 kr
Mads Drange: «Lungebrannen»
300 kr
Årbok Ryfylkemuseet: «Ryfylkehumoren»
250 kr
Geir K. Hus: Stikkvegar frå E 134
449 kr
Fritjof M. Pedersen: En vandrers testamente
395 kr
Lars Olav Fatland: Ekko frå levd liv (Dikt)
150 kr
Lars Olav Fatland: Kvinneliv
150 kr
Torunn Djuvik: Jordmødrer i Sauda
200 kr
Myklebust/Klungtveit: Nenad
490 kr
Rivedal: Minnebok. Om Ingeborg Bakka
270 kr
Arne Skogerbø: Historier frå Ryfylke
150 kr
Børge Lund: «Da var det helg»
399 kr
Julehefte Lunch
85 kr
Bordkalender Lunch
349 kr
Veggkalender Lunch
269 kr
Termometer Sauda sogelag
400 kr
Bestill bøker
Bøkene kan bestillast via bestillingsskjema, eller ved å senda epost til sauda.sogelag@gmail.com
I år markerer me at det er hundre år sidan første tapp på smelteverket i Sauda. Endeleg kom ein i gong med produksjon på det som sidan har vore hjørnesteinsbedrifta i lokalsamfunnet vårt. I årsskriftet har me tatt med ein artikkel som blei skriven for hundre år sidan. Avisa Stavangeren sende ein journalist inn fjorden for å skriva om oppstarten av produksjonen. Artikkelen fekk tittelen «Kjæmpen i Sauda begynder at arbeide». I dag, hundre år seinare, held framleis «kjæmpen» det gåande.
Ei anna kjempe me vil feira i dette årsskriftet, er Folkets Hus. Undertittelen kunne vore «nitti år med dugnad». Fredag 25. august i år stod Riksantikvaren på scena i storesalen og erklærte Folkets Hus for freda. I talen sin framheva ho dugnaden som har følgd huset i alle år: «Jeg vil takke alle dere som står bak den gode dugnadsånden i Sauda. Både de som den gang bygget Folkets Hus, dere som fyller huset med innhold og liv og alle dere som bidro til restaureringen.»
Dugnad i nitti år. Nedst er bilete frå tomta med dugnadsfolk som haldt på med grunnarbeid ca 1930. Øvst er dugnadsfolk med og skrapar maling og pussar dei gamle dørene under restaureringa i 2016-18.
Framsida av årsskriftet viser gateliv i nedre del av Rådhusgata på midten av 1900-talet. Roar Lund skriv om dei mange butikkane på denne tida, og spør «Kor blei det av alle dei gamle butikkane i Sauda?». I dag ser me fleire stengjer dørene i sentrum, sist familiebedrifta «Bryne’s konditori». Kanskje bør me læra noko av 1950-talet , då ein handla så godt som alt lokalt.
Elles spenner årsskriftet som vanleg breidt i tema – her skal det vera noko for alle. Me får lesa om bondelivet i artiklane om husmannsplassen på Molla og om livet i Hylsfjorden. Ulike personlegdomar blir portrettert: Ein matros frå Afrika som fall for ei butikkdame i Sauda, Faster By’n, Nikolai Aarthun frå Hellandsbygd og distriktslege Olav Gramstad – for å nemna nokre. Køyretøy og vegar er tema for to tekstar: Lars Njøten fortel om ein trøbil medan Ståle Lunde skriv om Røldalsvegen. Kjartan Fløgstad tar heller føtene fatt og vandrar mot himlaleitet. Også Guri Ravatn ser mot himmelen, men meir symbolsk, i sin tekst om aftanbøn i Ryfylke.
Årsskriftet kan også kjøpast i adventsbokhandelen vår: Me opnar fredag 24. november og held ope mellom kl 1200 og 1400 fredagar og laurdagar til og med 16. desember i lokala til Bryne’s konditori.
Tysdag inviterer Sauda sogelag til det siste møtet i haust, denne gongen i Folkets Hus i Storesal. Programmet er todelt denne kvelden. Først vil vi presentere bygda sin eigen folkekjære poet, Bjørn Ljung, i ord og tonar. Oskar Waage-Pettersen, Sigmund Andersen, Oddwar Wiersen, Lillian Nordengen, Lena Sjursen Haugland og Judith Landa har tatt på seg den oppgåva. Etter ein kaffi- eller tepause med noko å bite i, er det tid for å opne sogelaget si adventsgåve til saudabuen, årsskriftet for 2023. Det vil skriftstyraren, Kirsten Hellerdal Fosstveit ta seg av.
For første gong legg vi ut billettar for førehandssal. Desse kan ein kjøpe på biblioteket og på internett. Og er det billettar att på tysdag, blir dei selde ved inngangen. Billettane er ikkje nummererte, så her blir det, som det gjerne heiter på moderne norsk, free seating.
Oppdatering: Arrangementet er utseld.
Ver velkomne til ein triveleg sogelagskveld med songar og dikt skrivne av Bjørn Ljung.
«Bjørn Ljung, vår eigen poet i ord og tonar» presentert av Oskar Waage-Pettersen, Sigmund Andersen, Oddwar Wiersen, Lillian Nordengen, Lena Sjursen Haugland og Judith Landa.
Presentasjon av årsskriftet 2023. Sal av årsskriftet.
Billettsal
Førehandssal av billettar til 150 kr på biblioteket og på saudakultur.no.
Billettsalet startar 3. november.
Viss det er billettar igjen, blir dei selde ved inngangen.
Tysdag inviterer Sauda sogelag medlemmane i laget til den årlege vårturen. Ferda går denne gongen til Slettedalen, med frammøte klokka 17.00. Vi reknar med at veret er på vår side og planlegg friluftsmøte ved demninga ikkje mange metrane frå parkeringsplassen. Her vil Tone Årtun fortelje om liv og virke i dalen gjennom tidene. Hedlingen Tone veit mykje om korleis bygdefolket har brukt den grøderike dalen til seterdrift og til beite for dyra, anten dyra var «innleigde» frå andre bygder eller dei var drivne innetter dalen til hedlingane sine stølar. Ho vil også fortelje om då det var fast busetting heilt inne i Berdalen.
Ein gong drøymde saudabuen om vegutløysing mot Odda, men det blei med draumen, Slettedalsvegen kom aldri. Men den kraftkrevjande industrien såg verdien av å demme opp den vakre stølsdalen, og i 1960 var den 72 meter høge demninga på vestsida av dalen ferdig. For dei mange som var glade i Slettedalen, var det nok trist å oppleve at hustufter og setrar blei lagt under vatn. Som ein lett kan forstå: Det er mykje spanande historie i Slettedalen.
Vi fortel ikkje alt om programmet, for her kommer eit par små overraskingar. Hugs å ta med stol, kaffi og noko å bite i. Og spelar ikkje juniveret på lag med oss, flyttar vi møtet inn i Idrettshytta ved Minnehaugen. Dei som treng skyss, kan kontakte leiaren i sogelaget, Aslaug Astad, så blir det sikkert hjelp å få.
Ver velkomne til medlemsmøte i Slettedalen.
Frammøte ved demninga.
Viss dårleg vêr, blir møtet i idrettshytta.
Køyr gjerne fleire i same bil. Dei som treng skyss, kan kontakte Aslaug Astad, telefon 948 22 022.
