Tysdag kjem Paul Rune Engebretsen til Folkets Hus for å fortelje historia om Sauda Monteringslag. Det er Sauda sogelag som har invitert han. Paul Rune er mannen som verkeleg kan historia om den mekaniske bedrifta som faren hans, Paul Engebretsen, saman med fire andre saudabuar var med og stifta i 1948. Sjølv leia han bedrifta i mange år, sidan har han vore styreformann i driftsselskapet.

Kjært barn har som kjent mange namn. Monteringslaget heitte firmaet det første året. Så blei namnet Sauda Monteringslag, og frå 2006 snakkar vi om Weldone. Dette er den absolutte kortversjonen av bedriftshistoria. Den riktige og meir omfattande historia om oppturar og nedturar, suksessar og bommertar, om folk som kom, blei og etter kvart slutta i den trauste mekaniske bedrifta i Nedre Saudasjøen, overlet vi til Paul Rune å fortelje.

Og strøymar dei til, alle dei mekanikarane, sveisarane, kontorfolka og arbeidstakarar elles som har arbeidd på monteringslaget, kan det fort bli folksamt i Storesalen tysdag. Dei og alle andre interesserte er også velkomne til drøs, allsong og tradisjonell, velsmakande sogelagsmat.

– Roar Lund

• Dato: Tysdag 10. mars 2026
• Tidspunkt: kl 19:00
• Stad: Folkets Hus, Storesalen
• Sogelagsmat. Entre: 150 kr. Billettsal på biblioteket og på saudakultur.no

Nødland med fleire gamle bilete i sogelaget

Tysdag ber Sauda sogelag inn til det første sogelagsmøtet i 2026. For to år sidan vitja Inge Mikal Nødland sogelaget og viste filmar som i hovudsak urmakar Jensen hadde tatt opp – dei fleste frå 1960-talet. Filmane hadde Inge Mikal «vaska» og klargjort for framsyning. Saudabuane strøymde då til i hopetal for eit gjensyn med bygda og menneska som budde her for seksti år sidan. Ja, så mange kom at Sauda sogelag måtte invitere til ekstraforestilling for dei som ikkje fekk billett denne kvelden.

No viser det seg at Inge Mikal har meir å by på av interessant stoff frå «gamle dagar». Han har funne fram enda fleire godbitar frå fotoarkivet. Det er både stillbilete og filmkutt som er klare for framsyning til tysdagskvelden i Folkets Hus. Det er nok lurt å skunde seg å kjøpe billettar på biblioteket eller på saudakultur.no.

Februar er meir enn vinter, glatte fortau og brøytekantar. Det er også årsmøtemånaden for lag og foreiningar. Difor legg Sauda sogelag årsmøtet sitt til denne kvelden. Årsmøta i sogelaget er til vanleg greitt avvikla. Valkomiteen har gjort jobben, og dei har fått ja frå alle dei har spurd.

Ver velkomne, anten du er medlem eller ikkje, til det første sogelagsmøtet i 2026 – til filmframsyning, allsong, sogelagsmat og god drøs.

– Roar Lund

• Dato: Tysdag 24. februar 2026
• Tidspunkt: kl 19:00
• Stad: Folkets Hus, Storesalen
• Sogelagsmat. Entre: 150 kr. Billettsal på biblioteket og på saudakultur.no

Mange i Sauda lurar nok på kor det blei av Johan Brox, guten som vaks opp i Hellandsbygd på 1970-talet og som mellom anna var innom i Ryfylke som journalist dei siste åra tiåret etter. Han skreiv jo godt, ungguten, meinte mange då.

For alle dei som no lurar på svaret, er det heil sikkert flott at Sauda sogelag kvart år i november presenterer utflytta saudabuar, blant dei også hedlingar, i møteserien «Kor vart dei av?»  Tysdag i neste veke kjem Johan heilt frå Oslo og til Storesalen i Folkets Hus for å dra historia om det meste av det han har vore med på sidan han reiste ut fjorden – eller var det over fjellet?  – i 1990. Og kanskje går han så langt tilbake i historia som då han vaks opp i det som nærast kan kallast Saudefaldene sitt underbruk, Hellandsbygd og til skuletida elles i heimkommunen.

Vi ynskjer velkomen til det første sogelagsmøtet i haust. Der held vi fram med det  møteopplegget som så mange vil kjenne igjen, med god drøs, allsong og sogelagsmat. Billettar får de kjøpt på biblioteket eller på saudakultur.no.

– Roar Lund

• Dato: Tysdag 7. oktober 2025
• Tidspunkt: kl 19:00
• Stad: Folkets Hus, Storesalen