Elvarhøgdi

Skulegata 11

gnr 28 / bnr 166

Byggjeår: 1934

Bruk: Bustad, ølagentur, manufaktur, broderi- og hobbybutikk

Også tomta som dette huset står på, er skild ut frå gardsbruk nr. 5. som tilhøyrde Daniel Fløgstad. Gardshuset og uthusa på bruket låg like i nærleiken. Huset som vart sett opp her, vart bygt for samvirkelagsstyrar Johannes Dalene i 1934. Men han åtte huset berre i stutt tid, for allereie i 1936 bygde han seg eit nytt bustadhus langs den gamle Saudasjøvegen, som nå heiter i Hamnaflåt. Den som kjøpte huset i Skulegata. var Kristian Kaldheim. Då var huset eit reint bustadhus, men Kaldheim opna eit ølagentur i kjellaren. Fyrst representerte han bade Tou og Hansa, seinare berre Tou. Agenturet hadde han fram til 1950, då han avvikla verksemda og byrja på fabrikken.

Her ser ein husa i Skulegata på rekkje og rad: Lengst til venstre (i krossen der Skulegata og Brugata møtest) er Lundvang, så kjem Elvarhøgdi. Vidare følgjer Elvflåt II, Elvflåt I, Heimfred og Mollatun.

*Øyra fotografert frå lufta. Elvarhøgdi er bygget fremst i biletet. Foto: Digitaltmuseum.*

Då Waldemar Sahr og kona Inger var leigebuarar, brukte den sistnemnde eit rom i fyrste høgda til damefrisørsalong. Men fyrste høgda vart ikkje ombygd til forretningslokale før i 1958, då Betty Knutsen flytte inn med manufakturforretninga. Ho heldt til her til siste halvdel av 1970-åra, då Ellinor Pedersen flytte inn med broderi- og hobbyfirmaet Elry. Ellinor var aktiv i forretninga fram til om lag 1990 då ho gjekk over i pensionisttilværet og selde forretninga til fru Bergit Kvaløy som dreiv verksemda i same huset.

Ekteparet Kaldheim hadde fire barn, tre gutar og ei jente. Berre den eldste guten, Torbjørn, vart verande i Sauda. Men det vart ikkje han som overtok huset etter at foreldra gjekk bort. Det var jenta i syskenflokken, Karin Kristine, gift og busett i Ølen.

Kjelde: Tre gater på Øyra